مسجد الجبری

مسجد الجبری محلہ الکوت میں قصر ابراہیم کے قریب واقع ہے۔ الکوت پرانے ہفوف کا قدیم ترین محلہ ہے۔ یہ مسجد الاحساء کی قدیم ترین اور مشہور ترین مساجد میں سے ایک ہے۔ اسے سیف بن زامل الجبری نے بنو جبر کی ریاست کے دور میں، تقریباً 850 ہجری (1446 عیسوی) میں تعمیر کیا اور اس کے لیے کھیت اور کھجور کے باغ وقف کیے۔ یہ عبادت کے ساتھ ساتھ درس و تدریس اور علم کا مرکز بھی رہی۔ یہ مٹی اور چونے کے پتھر سے بنی ہے۔ ایک دوسرے کو کاٹتی محراب دار چھتیں، کئی برآمدے اور مختلف وضع کے گنبد اس کی پہچان ہیں، اور اس کا مینار گول ستون کی شکل کا ہے۔ اس میں تقریباً 1,600 نمازیوں کی گنجائش ہے۔ صدیوں کے دوران اس کی بار بار مرمت ہوئی۔ آخری مرمت 1437 ہجری (2016 عیسوی) میں تاریخی مساجد کی دیکھ بھال کے منصوبے کے تحت ہوئی، اور اس میں اصل تعمیراتی مواد برتا گیا۔ یہ آج بھی ایک آباد مسجد ہے۔